A sira quando vaju o me paisi

A sira quando vaju o me paisi
m'assetto sempre o giru da funtana
e staciarria, dà, puru nu misi,
nu misi e menzu e ancora na simana.

Quando jeu vaiu, no mbaju pe' cantanti
o u sento i sonaturi chi portaru,
ma dicu a verità tra tutti quanti
mi piaci quandu canta Cavallaru:

"Partiu lu jimbusedu e jjhiu a la fera";
"Mulinarella mia, mulinarella";
"di nomu ida si chiama Stilla Chjara";
"mulinarella mia, quantu si bella".

E mi piaci assai quandu jeu viju
vecchi e fijjoli ballari a tirantella,
assai mascialu e tuttu mi ricriju
se a fimmana nci vola la gunnella.

Comu prima dicìa dà, supa a jhazza
a sira nc’è na bella giuventù,
no comu e tempi mei , brutta vitazza,
e menu mali ca ora no nc’è cchiù.

Nta stati nuda fimmana, na vota
jera assettata dà, sup’e pachini,
ma ora ndavi tanti e sugnu a rota
i tutti i rrazzi: locali e ucraìni.

Poi versu i deci idu cantandu arriva:
u pacificu, Vicenzu , bravu assai,
cu na canzuni nova, ebbiva ebbiva,
i Porsi, a stu minutu je’ arrivai,

ca jimmo a ccarovana, comu sai,
m’arrivamu a Madonna da muntagna,
pe quantu è bella tu non ti stanchi mai
ma guardi. E s’Ida voli ndaccumpagna.

Francesco Lopreste